திண்டுக்கல் மாவட்டம், பழனி தண்டபாணி மடத்துக்குச் சொந்தமான சுமார் ரூ.100 கோடி மதிப்புள்ள நிலம் போலி ஆவணங்கள் மூலம் மோசடியாகப் பத்திரப்பதிவு செய்யப்பட்ட விவகாரத்தில், முக்கியக் குற்றவாளியான இடைத்தரகர் ஜெயபிரகாஷின் போலீஸ் காவல் நிறைவடைந்ததைத் தொடர்ந்து, அவர் நீதிமன்றத்தில் ஆஜர்படுத்தப்பட்டார். பழனி தண்டபாணி மடத்தின் நில மோசடி தொடர்பாகத் தொடக்கத்தில் பழனி அடிவாரம் காவல்துறையினர் வழக்குப் பதிவு செய்து விசாரணை நடத்தி வந்தனர். இந்த விவகாரம் விஸ்வரூபம் எடுத்ததைத் தொடர்ந்து, வழக்கின் தீவிரத்தைக் கருத்தில் கொண்டு தமிழக அரசு கடந்த ஜூன் மாதம் வழக்கை சிபிசிஐடி விசாரணைக்கு மாற்றி உத்தரவிட்டது இதையடுத்து திண்டுக்கல் மற்றும் பழனியில் முகாமிட்டு தீவிர விசாரணை மேற்கொண்ட சிபிசிஐடி போலீஸார், சார் பதிவாளர் ஜஸ்டின் மணிகண்டன், விழுப்புரத்தைச் சேர்ந்த அறக்கட்டளை பிரமுகர் முருகதாஸ், நிலத்தை வாங்கிய மடத்துக்குளத்தைச் சேர்ந்த வெள்ளத்துரை, பழனி புதூரைச் சேர்ந்த சேதுபதி மற்றும் வழக்கறிஞர் அன்வர்தீன் உள்ளிட்ட 11 பேர் மீது வழக்குப் பதிவு செய்து அவர்களைக் கைதுசெய்தனர். கார் பார்க்கிங்காக உள்ள கோயில் நிலம் இவ்வழக்கின் முக்கியக் குற்றவாளியாகக் கருதப்படும் ஒட்டன்சத்திரத்தைச் சேர்ந்த பத்திர எழுத்தரும், இடைத்தரகருமான ஜெயபிரகாஷ் கடந்த ஆகஸ்ட் 7-ஆம் தேதி சிபிசிஐடி அலுவலகத்தில் சரணடைந்தார். உடனடியாக நீதிமன்றத்தில் ஆஜர்படுத்தப்பட்ட அவர் நீதிமன்றக் காவலில் சிறையில் அடைக்கப்பட்டார். தொடர்ந்து, ஜெயபிரகாஷை 7 நாள்கள் காவலில் எடுத்து விசாரிக்க சிபிசிஐடி போலீஸார் குற்றவியல் நீதிமன்றம் 2-ல் மனுத் தாக்கல் செய்தனர். ஆனால், நீதிமன்றம் ஒரு நாள் மட்டுமே போலீஸ் காவலுக்கு அனுமதி அளித்தது. ஒரு நாள் விசாரணை போதுமானதாக இல்லை என்றும், வழக்கு தொடர்பான சந்தேகங்களுக்குப் போதிய விளக்கங்கள் கிடைக்கவில்லை என்றும் கூறி, அவரை ஒரு வாரம் போலீஸ் காவலில் எடுத்து விசாரிக்க அனுமதி கோரி திண்டுக்கல் முதன்மை மாவட்ட அமர்வு நீதிமன்றத்தில் சிபிசிஐடி சார்பில் சீராய்வு மனுத் தாக்கல் செய்யப்பட்டது. கடந்த 22-ஆம் தேதி இந்த மனு நீதிபதி பத்மநாதன் முன்னிலையில் விசாரணைக்கு வந்தது. மனுவை விசாரித்த நீதிபதி, ஜெயபிரகாஷை 24-ஆம் தேதி மதியம் 1 மணி வரை 3 நாள்கள் போலீஸ் காவலில் வைத்து விசாரிக்க அனுமதி வழங்கி உத்தரவிட்டார். இடைத்தரகர் ஜெயப்பிரகாஷ் இதனைத் தொடர்ந்து ஜெயபிரகாஷை தங்களது அலுவலகத்திற்கு அழைத்துச் சென்று சிபிசிஐடி போலீஸார் தீவிர விசாரணை நடத்தினர். மேலும், ஒட்டன்சத்திரத்தில் உள்ள அவரது வீட்டிற்கு அழைத்துச் சென்று நடத்தப்பட்ட சோதனையில், அங்கிருந்த 2 கணினி CPU-க்கள் மற்றும் முக்கிய ஆவணங்களை போலீஸார் பறிமுதல் செய்தனர். இந்த விசாரணையின்போது ஜெயபிரகாஷ் பல திடுக்கிடும் தகவல்களைத் தெரிவித்ததாகக் காவல்துறை தரப்பில் தெரிவிக்கப்பட்டுள்ளது. 3 நாள்கள் போலீஸ் காவல் நிறைவடைந்த நிலையில், இன்று மதியம் 1 மணியளவில் ஜெயபிரகாஷை முதன்மை மாவட்ட அமர்வு நீதிமன்றத்தில் சிபிசிஐடி போலீஸார் ஆஜர்படுத்தினர். அத்துடன், அவரது வீட்டில் இருந்து கைப்பற்றப்பட்ட 2 கணினி CPU-க்களையும் நீதிமன்றத்தில் ஒப்படைத்தனர். நீதிமன்ற நடைமுறைகள் முடிந்ததைத் தொடர்ந்து, ஜெயபிரகாஷ் பலத்த பாதுகாப்புடன் மதுரை மத்திய சிறையில் அடைக்க அழைத்துச் செல்லப்பட்டார். முழு கட்டுரையைப் படிக்க, கீழே உள்ள இணைப்பைப் பயன்படுத்தவும்.
Il s’agit d’un résumé en tamoul pour une lecture rapide. Pour le reportage complet, le contexte et les mises à jour, consultez le site de l’éditeur.
Lire l'article complet
https://www.vikatan.com/government-and-politics/palani-rs-100-crore-land-scam-broker-jayaprakashs-computers-handed-over-to-the-court
