எம்.எல்.ஏ.வாக மீண்டும் செயல்பட இசக்கி சுப்பையா கோரிக்கை: ஐகோர்ட்டு மறுப்பு

சென்னை, அம்பாசமுத்திரம் தொகுதி எம்.எல்.ஏ.வாக மீண்டும் செயல்பட அனுமதிக்கக் கோரி முன்னாள் எம்.எல்.ஏ. இசக்கி சுப்பையா தாக்கல் செய்த மனுவை ஏற்க சென்னை ஐகோர்ட்டு மறுப்பு தெரிவித்துள்ளது. இதனால், அதிமுக எம்.எல்.ஏ.க்களின் ராஜினாமா, தகுதி நீக்கம் தொடர்பான விவகாரம் மீண்டும் பரபரப்பை ஏற்படுத்தியுள்ளது. ராஜினாமா அதிமுக சார்பில் அம்பாசமுத்திரம் தொகுதியில் போட்டியிட்டு வெற்றி பெற்ற இசக்கி சுப்பையா, பின்னர் தனது எம்.எல்.ஏ. பதவியை ராஜினாமா செய்தார். தொடர்ந்து அவர் ஆளும் தவேகவில் இணைந்தார். இந்நிலையில், அம்பாசமுத்திரம் தொகுதியில் தற்போது எம்.எல்.ஏ. இல்லாததால் பொதுமக்கள் பல்வேறு பிரச்னைகளை எதிர்கொண்டு வருவதாகக் கூறிய இசக்கி சுப்பையா, மீண்டும் தொகுதி எம்.எல்.ஏ.வாக செயல்பட அனுமதிக்க வேண்டும் என சபாநாயகர் ஜே.சி.டி. பிரபாகரிடம் கடந்த 28-ம் தேதி மனு அளித்தார். மேலும், இடைத்தேர்தல் தொடர்பான வழக்கில் தீர்ப்பு வெளியாகும் வரை எம்.எல்.ஏ.வாக தொடர அனுமதிக்க வேண்டும் என்றும், ஏற்கனவே தான் அளித்த ராஜினாமா கடிதத்தை திரும்பப் பெற அனுமதிக்க வேண்டும் என்றும் சென்னை ஐகோர்ட்டில் மனு தாக்கல் செய்திருந்தார். இதற்கிடையே, அதிமுகவில் இருந்து வெற்றி பெற்ற 6 எம்.எல்.ஏ.க்கள் ஆளும் தவேகவில் இணைந்தனர். இதையடுத்து, அவர்கள் தங்களது பதவிகளை ராஜினாமா செய்தனர். அவர்களின் ராஜினாமா கடிதங்களை சபாநாயகர் ஏற்றுக்கொண்டார். ஆனால், கட்சி மாறிய 6 எம்.எல்.ஏ.க்கள் மீதும் கட்சித் தாவல் தடைச் சட்டத்தின் கீழ் நடவடிக்கை எடுத்து தகுதி நீக்கம் செய்ய வேண்டும் என அதிமுக வலியுறுத்தியது. இதுதொடர்பாக சபாநாயகரிடமும் அதிமுக சார்பில் மனுக்கள் அளிக்கப்பட்டன. சென்னை ஐகோர்ட் தகுதி நீக்கக் கோரிக்கைகள் நிலுவையில் இருந்த நிலையில், 6 எம்.எல்.ஏ.க்களின் ராஜினாமாவை சபாநாயகர் ஏற்றுக்கொண்டதற்கு அதிமுக கடும் எதிர்ப்பு தெரிவித்தது. இதனை எதிர்த்து அதிமுக கொறடா அக்ரி கிருஷ்ணமூர்த்தி மற்றும் தேசிய மக்கள் சக்தி கட்சித் தலைவர் எம்.எல். ரவி ஆகியோர் சென்னை உயர் நீதிமன்றத்தில் வழக்கு தொடர்ந்தனர். இந்த வழக்கில் அனைத்து தரப்பு வாதங்களும் நிறைவடைந்த நிலையில், தீர்ப்பை தேதி குறிப்பிடாமல் ஐகோர்ட்டு ஒத்திவைத்துள்ளது. இந்த சூழலில், தேர்தல் வழக்கில் தீர்ப்பு வெளியாகும் வரை தன்னை மீண்டும் எம்.எல்.ஏ.வாக செயல்பட அனுமதிக்க வேண்டும் என்ற கோரிக்கையுடன் இசக்கி சுப்பையா கூடுதல் மனு தாக்கல் செய்திருந்தார். ஆனால், அவரது கோரிக்கையை ஏற்க முடியாது என ஐகோர்ட்டு திட்டவட்டமாக தெரிவித்துள்ளது. இதனால், அம்பாசமுத்திரம் தொகுதி எம்.எல்.ஏ. பதவி மற்றும் அதிமுக எம்.எல்.ஏ.க்களின் ராஜினாமா, தகுதி நீக்கம் தொடர்பான விவகாரத்தில் அடுத்தகட்ட நடவடிக்கைகள் குறித்த எதிர்பார்ப்பு அதிகரித்துள்ளது. முழு கட்டுரையைப் படிக்க, கீழே உள்ள இணைப்பைப் பயன்படுத்தவும்.