ராணிப்பேட்டை: விசிக நிர்வாகி கொடூரக் கொலை; விசாரணை வளையத்துக்குள் 4 பேர்; பழிக்குப் பழியாக நடந்ததா?

ராணிப்பேட்டை மாவட்டம், கலவை அருகேயுள்ள நாகலேரி கிராமத்தைச் சேர்ந்தவர் சிவா (52). விடுதலைச் சிறுத்தைகள் கட்சியில் செயற்குழு உறுப்பினராக இருந்து வந்த சிவா நேற்று இரவு பைக்கில் சென்று கொண்டிருந்தபோது 4 பேர் கொண்ட கும்பல் அவரை வழிமறித்து கொடூரமாக வெட்டி சாய்த்தது. இதில், சம்பவ இடத்திலேயே சிவா துடிதுடித்து உயிரிழந்தார். தகவலறிந்ததும், சிவாவின் உறவினர்களும், வி.சி.க நிர்வாகிகளும் அங்கு திரண்டு கொலையாளிகளை விரைவாகக் கைது செய்யக்கோரி மறியலில் ஈடுபட்டனர். போலீஸார் உறுதியளித்ததையடுத்து அவர்கள் கலைந்து சென்றனர். இதையடுத்து, சிவாவின் உடலை மீட்டு பிரேதப் பரிசோதனைக்காக அரசு மருத்துவமனைக்கு அனுப்பி வைத்த போலீஸார் கொலைக்கான காரணத்தைக் கண்டறிய தீவிர விசாரணையில் இறங்கினர். அப்போது, முன்விரோத தகராறில் சிவா கொல்லப்பட்டிருப்பதாகத் தெரியவந்தது. வி.சி.க நிர்வாகி சிவா அதாவது, கடந்த ஏப்ரல் மாதம் 13-ம் தேதி, கலவை அருகேயுள்ள அகரம் கிராமத்தைச் சேர்ந்த அருண்ராஜ் என்ற 19 வயது இளைஞன் படுகொலை செய்யப்பட்டார். இந்த வழக்கில், வி.சி.க நிர்வாகி சிவாவின் மகன் குகன் (26) உள்ளிட்ட 3 பேர் கைது செய்யப்பட்டு சிறையில் அடைக்கப்பட்டனர். இவர்கள் நேற்று முன்தினம்தான் சிறையில் இருந்து ஜாமீனில் வெளியே வந்துள்ளனர். அருண்ராஜின் கொலைக்குப் பழிதீர்க்க அவரின் தரப்பு தயாராக இருந்ததாகச் சொல்லப்படுகிறது. இந்த விவகாரத்தில், மகனைக் காப்பாற்றுவதற்காக சிவா எதிர்தரப்புடன் விரோதத்தை மேலும் வளர்த்துக்கொண்டதாகவும் கூறப்படுகிறது. இந்த நிலையில்தான் சிவா கொலை செய்யப்பட்டிருக்கிறார். ஆனாலும், வேறு ஏதேனும் காரணத்துக்காக சிவா கொலை செய்யப்பட்டாரா? என்ற கோணத்திலும் போலீஸார் தீவிர விசாரணை மேற்கொண்டு வரும் வேளையில், சந்தேகத்திற்கிடமான 4 பேரைப் பிடித்து விசாரணை வளையத்துக்குள் கொண்டுவந்திருக்கின்றனர். இந்தச் சம்பவத்தால், அந்தப் பகுதியில் ஒருவித பதற்றமான சூழல் நிலவிக் கொண்டிருக்கிறது. பெரம்பலூர்: கல்குவாரியில் வாலிபர் கல்லால் அடித்துக் கொலை; குற்றவாளிகளைத் தேடும் போலீஸ்! முழு கட்டுரையைப் படிக்க, கீழே உள்ள இணைப்பைப் பயன்படுத்தவும்.