அமெரிக்க வேலையை விட்டுத் திரும்பிய தமிழர்... இந்திய MRI-யால் உலகின் கவனத்தை ஈர்த்தது எப்படி?

பெங்களூரைச் சேர்ந்த 'Voxelgrids' என்ற மருத்துவத் தொழில்நுட்ப நிறுவனம், முற்றிலும் உள்நாட்டில் தயாரிக்கப்பட்ட ஹீலியம் இல்லாத 1.5 டெஸ்லா MRI ஸ்கேனரை அறிமுகப்படுத்தியுள்ளது. அமெரிக்காவில் பணியாற்றிய தமிழரான டாக்டர் அர்ஜுன் அருணாசலம் தலைமையில் உருவான இந்தத் தொழில்நுட்பம், இறக்குமதி செய்யப்படும் MRI கருவிகளுக்கு மாற்றாகப் பார்க்கப்படுகிறது. வெளிநாட்டு நிறுவனங்களின் ஆதிக்கம்: உலகளாவிய MRI கருவிகள் சந்தையில் GE HealthCare, Siemens Healthineers, Philips உள்ளிட்ட பன்னாட்டு நிறுவனங்களே அதிகம் ஆதிக்கம் செலுத்துகின்றன. இதனால், ஒரு 1.5 டெஸ்லா MRI கருவியின் விலை ரூ.5 கோடி முதல் ரூ.8 கோடி வரை உள்ளது. மருத்துவ உபகரணங்களுக்காக இந்தியா தனது தேவையில் பெரும்பகுதியை இறக்குமதியையே சார்ந்துள்ளது. இதன் காரணமாக, மேம்பட்ட MRI வசதிகள் பெருநகரங்களில் உள்ள பெரிய மருத்துவமனைகளில் மட்டுமே பெருமளவில் கிடைக்கின்றன. Voxelgrids தொடக்கம்: GE நிறுவனத்தில் MRI ஆராய்ச்சியாளராகப் பணியாற்றிய டாக்டர் அர்ஜுன் அருணாசலம், 2008-ஆம் ஆண்டு அந்தப் பணியை விட்டு இந்தியா திரும்பினார். பின்னர், 2017-ல் Voxelgrids நிறுவனத்தைத் தொடங்கி, குறைந்த செலவில் MRI தொழில்நுட்பத்தை உருவாக்கும் முயற்சியில் ஈடுபட்டார். வழக்கமான MRI கருவிகள் இயங்குவதற்குத் திரவ ஹீலியம் அவசியமாகிறது. அதன் பராமரிப்புச் செலவு அதிகமாக இருப்பதால், சிறிய மருத்துவமனைகளில் அவற்றை நிறுவுவதும் பராமரிப்பதும் சவாலாக உள்ளது. ஆனால், Voxelgrids உருவாக்கியுள்ள 1.5 டெஸ்லா MRI கருவி, ஹீலியம் இல்லாமல் இயங்கும் வகையில் வடிவமைக்கப்பட்டுள்ளது. அனுமதி மற்றும் பயன்பாடு: இந்தத் திட்டத்திற்கு Tata Trusts மற்றும் Zoho உள்ளிட்ட நிறுவனங்கள் நிதியுதவி வழங்கியுள்ளன. மேலும், இந்திய மருந்து தரக் கட்டுப்பாட்டு அமைப்பான CDSCO-வின் வணிகப் பயன்பாட்டு அனுமதியையும் இந்த MRI கருவி பெற்றுள்ளது. இறக்குமதி செய்யப்படும் MRI கருவிகளுடன் ஒப்பிடும்போது, இந்தக் கருவியைக் குறைந்த செலவில் தயாரிக்கவும் பராமரிக்கவும் முடியும் என நிறுவனம் தெரிவிக்கிறது. இதன் மூலம், டயர்-2, டயர்-3 நகரங்கள் மற்றும் கிராமப்புற மருத்துவமனைகளிலும் MRI வசதியை விரிவுபடுத்துவதற்கான வாய்ப்பு உருவாகும் என எதிர்பார்க்கப்படுகிறது. முழு கட்டுரையைப் படிக்க, கீழே உள்ள இணைப்பைப் பயன்படுத்தவும்.