வயசானாலும் முதுகு வலி வராமல் இருக்க இந்த 10 டிப்ஸ்!

மூளையும் உடலின் மற்ற உறுப்புகளும் தகவல் பரிமாறிக்கொள்ள முக்கிய பாதையாக இருப்பது முதுகுத் தண்டுவடம். முதுகெலும்புத் தொடரின் மையப்பகுதியில் பாதுகாப்பாக அமைந்துள்ள இதிலிருந்து நரம்புகள் உடல் முழுவதும் பரவியுள்ளன. இன்றைய வாழ்க்கை முறையில் பலரும் முதுகு வலியால் அவதிப்படுகின்றனர். முதுகு வலியைத் தவிர்த்து உடலை ஆரோக்கியமாக வைத்துக்கொள்ள உதவும் 10 வழிகள் இதோ. 1. நீண்ட நேரம் ஒரே இடத்தில் அமர வேண்டாம்; நீண்ட நேரம் ஒரே இடத்தில் அமர்ந்திருப்பது முதுகுப் பகுதியில் அழுத்தத்தை ஏற்படுத்தலாம். எனவே அவ்வப்போது எழுந்து நடந்து உடலை அசைப்பது நல்லது. நாற்காலியில் அமரும்போது கீழ் முதுகு உட்பட முதுகுப் பகுதியை சரியான ஆதரவுடன் வைத்துக்கொள்ள வேண்டும். 2. தினமும் உடற்பயிற்சி செய்யுங்கள்; தினமும் நடைப்பயிற்சி செய்வது உடல் தசைகளை வலுப்படுத்த உதவும். யோகா மற்றும் லேசான உடற்பயிற்சிகளையும் மேற்கொள்ளலாம். உடல்நிலைக்கு ஏற்ப தினசரி உடற்பயிற்சி செய்வது முதுகின் ஆரோக்கியத்திற்கு நல்லது. 3. ஸ்ட்ரெச்சிங் பயிற்சிகளை மேற்கொள்ளுங்கள்; முதுகுத் தசைகளை தளர்வாக்கும் ஸ்ட்ரெச்சிங் பயிற்சிகள் உதவியாக இருக்கும். முதுகு மற்றும் வயிற்றுப் பகுதி தசைகளை வலுப்படுத்தும் பயிற்சிகளையும் செய்யலாம். இருப்பினும் கடுமையான வலி இருந்தால் மருத்துவரின் ஆலோசனைக்குப் பிறகே பயிற்சி செய்ய வேண்டும். 4. ஹை ஹீல்ஸ் அணிவதை குறைக்கவும்; அதிக உயரமான ஹை ஹீல்ஸ் அணிவது உடலின் இயல்பான சமநிலையை மாற்றக்கூடும். இதனால் கால்கள் மற்றும் முதுகுப் பகுதியில் கூடுதல் அழுத்தம் ஏற்படலாம். நீண்ட நேரம் ஹை ஹீல்ஸ் அணிவதைத் தவிர்ப்பது நல்லது. 5. எடையுள்ள பொருட்களை சரியான முறையில் தூக்குங்கள்; அதிக எடையுள்ள பொருட்களை நின்றபடியே முதுகை வளைத்து தூக்கக் கூடாது. பொருளின் அருகில் சென்று முட்டியை மடக்கி, முதுகை முடிந்தவரை நேராக வைத்து தூக்க வேண்டும். இதனால் முதுகில் ஏற்படும் தேவையற்ற அழுத்தத்தை குறைக்கலாம். 6. ஒரு பக்கத்தில் மட்டும் எடையை சுமக்க வேண்டாம்; அதிக எடையுள்ள பையை ஒரு தோளில் மட்டும் சுமப்பது உடல் சமநிலையை பாதிக்கலாம். முடிந்தவரை எடையை இரு பக்கங்களிலும் சமமாகப் பிரித்து எடுத்துச் செல்ல வேண்டும். பள்ளி மாணவர்களும் அதிக எடையுள்ள பைகளைத் தவிர்ப்பது நல்லது. 7. சரியான மெத்தையைத் தேர்வு செய்யுங்கள்; மிகவும் கடினமான அல்லது மிகவும் மென்மையான மெத்தை அனைவருக்கும் ஏற்றதாக இருக்காது. உடலுக்கு போதுமான ஆதரவு அளிக்கும் நடுத்தர உறுதியுள்ள மெத்தையைத் தேர்வு செய்யலாம். சரியான தூக்க நிலையும் முதுகு ஆரோக்கியத்தில் முக்கிய பங்கு வகிக்கிறது. 8. உடல் எடையை கட்டுக்குள் வைத்திருங்கள்; அதிக உடல் எடை கீழ் முதுகுப் பகுதியில் கூடுதல் அழுத்தத்தை ஏற்படுத்தலாம். சீரான உணவு மற்றும் உடற்பயிற்சி மூலம் உடல் எடையை கட்டுப்பாட்டில் வைத்துக்கொள்ளுங்கள். சுறுசுறுப்பான வாழ்க்கை முறையைப் பின்பற்றுவதும் முதுகு ஆரோக்கியத்திற்கு உதவும். 9. போதுமான அளவு தண்ணீர் குடியுங்கள்; உடலின் பல்வேறு திசுக்கள் சரியாக செயல்பட போதுமான நீர்ச்சத்து அவசியம். தினமும் தேவையான அளவு தண்ணீர் குடிப்பது உடலின் ஒட்டுமொத்த ஆரோக்கியத்திற்கு உதவுகிறது. குறிப்பாக நீர்ச்சத்து குறையாமல் பார்த்துக்கொள்வது முக்கியம். 10. நீடிக்கும் வலியை அலட்சியம் செய்யாதீர்கள்; சில நேரங்களில் ஏற்படும் லேசான முதுகு வலி ஓய்வுக்குப் பிறகு குறையலாம். ஆனால் வலி பல நாட்கள் நீடித்தாலோ அல்லது அதிகரித்தாலோ மருத்துவரை அணுகுவது அவசியம். குறிப்பாக காலில் உணர்வின்மை, பலவீனம் அல்லது கடுமையான வலி இருந்தால் உடனடியாக மருத்துவ ஆலோசனை பெற வேண்டும். களாக்காய் சாப்பிடுவதால் கிடைக்கும் ஆரோக்கிய நன்மைகள்! முழு கட்டுரையைப் படிக்க, கீழே உள்ள இணைப்பைப் பயன்படுத்தவும்.